تحت عنوان "نعم للافراج عن السوريين ولا لتكريس الظلم على اللبنانيين"، نظم أهالي المعتقلين في صيدا وشباب مسجد بلال بن رباج مسيرة انتهت باعتصام امام مسجد بهاء الدين الحريري في صيدا، حيث كانت عدة كلمات أبرزها للاهالي القاها الناشط الصيداوي خالد البوبو جاء فيها:

"إلنا ١٢ سنة منرفع صوتنا لرفع الظلم عن شبابنا ومشايخنا. ولكن للأسف الدولة العميقة بلبنان ما عندها الا مزيدا من الظلم علينا.

وصار واضح انو نحنا بنظرهم الحلقة الأضعف خاصة لما تأكدوا انو المحسوبين على السنة مشاركين بالظلم علينا وبالمؤامرة.. فأخدو راحتهم!!

الجميع يعلم شو كانت قضية شبابنا ومشايخنا الأسرى وخاصة الشيخ احمد الأسير وهي نصرة الشعب السوري المظلوم الي كانت ترتكب بحقو ابشع انواع المجازر وما كان الو نصير الا القليل.

وكانو المهيمنين على لبنان شركاء اساسيين للفارّ الأسد وشركاء بقتل وتهجير الشعب السوريورفْض هيدي الهيمنة اصلا كانت قضية الشيخ احمد الأسير وكان علنا يطالب بحل لهذه الهيمنة من خلال حصرية السلاح بيد الدولة والجيش.

واليوم صار معظم اللبنانيين ومنهم حلفاء السلاح بالأمس يطالبون بما كان يطالب به الشيخ.ولكن معظمهم حتى اللحظة راضيين بالظلم الي وقع علينا بسبب حسابات شعبوية اوطائفية او خوفا على الزعامة او حقدا على التدين السني.

وبدل ما يخف الظلم علينا عم بزيد اكتر واكتر عم بيعملو مخارج لكبار المجرمين والعملاء والسارقين وغيرهموشبابنا ومشايخنا بنكلو فيهم بالمؤبدات المبرمة ظلماً وهلأ وبعد اخد ورد لسنة حول تسليم الإخوة السوريين الثوار  لبلدهم وافق لبنان ونبارك لإخواننا السوريين، وشو كان حجة الرفض عند وزير العدل ورئيس الجمهورية وغيرهم انو هول ارهابيين وقتلة جيش!!

وبعد الضغط وجدولهم المخارج ووافق لبنان...

علما ان الإخوة السوريبن هول ثوار واحرار ومظلومين بلبنان ولازم لبنان يعتذر منهم لانه كان متآمر مع هيمنة السلاح عليهم

وبالمقابل بدهم يخلو شبابنا ومشايخنا وهني بنفس ملفات الإخوة السوريين بالسجونولك شو هيدا الظلم علينا ؟؟!!يعني بيظلمو بوقاحة!! عنجد !! ما في اوقح من هيك!!

(ههه) لأ وبقولو انو نحنا ما اطلقنا سراحهم انما هي اتفاقية تسليم وبكملو محكوميتهم ببلدهم ههههه".

واضاف: "علنا قال رئيس الجمهورية بدو يعمل حلول للبنانيين واكد رئيس الحكومة ان اخراج اللبنانيبن حيكون قبل السوريبن..ولهلأ ما في اي حل جدي للبنانيبن.

يعني الأخ الي مثلا هو بنفس ملف الأخ السوري باحداث عرسال والي معظمها على خلفية الثورة وتداعياتها ...العرسالي واهلو حيشوفو الأخ السوري عند اهلو فرحانين فيه وهذا حقو وتأخر.

بينما الأخ العرسالي واهلو زوجتو او امو او ابناؤو بدهم يعيشو ابشع انواع الظلم والحزن!!

ولك ظلمكم صار وقح ونحنا مش حنسكت!!

اصلا كان لازم تاني يوم سقط فيه نظام صيدنايا كان لازم يطلق سراح شبابنا ومشايخنا فورا سواء سوريين او لبنانيين وتفتح صفحة جديدة.

ليش مصرين على ظلمنا ؟؟ في سجون مكتظة معفنة بدون ادنى حقوق السجين ولك وين بدكم تروحو من غضب الله ومن دعاوي الأمهات والأطفال.

اطلقوا سراح شبابنا ومشايخنا فورا وما تتحججو بحجج واهية بس بدكم بتجيبو المخرج من تحت الأرض زي ما عم تعملو بملف السوريبن !!! حاش تقولوا قانون ومش قانون ما انتو بتيدروها مثل ما بدكم!!

بعدين نحنا ما عم نطالب بحل لشبابنا فقط بل لكل السجناء ومن كل الطوائف لانو السجين على حال السجون اليوم عم تعدمو الدولة على البطيئ.

واخيرا بدي انصح نفسي واياكم وكل متعاطف مع مظلوميتنا مش لازم نكل ولا نمل ولا نسكت ابدا ابدا ابدا يعني يحاول احدنا يتصور نفسو هو محل شبابنا واهلهم كيف بكون شعورك ؟؟ مش حنسكت بإذن الله".